تورك هويتلي صنعتكارلارلا تانيشليغيميزين آرديندا ، اؤز واختسيز اؤلوموايله تكي آذربايجاني يوخ ، بوتون ايراني بئله داغلايان قدرتلي شاعير ، با جاريقلي خطاط و تالانتلي قرآن اوخوجوسو رحمتليق مهدي خازن حاقيندا ، هفته ليگيميزين نوبتي بوصايين دا اوخو جولاريميزا معلومات وئريرم ...

خازن تخلصونو داشيان حاج حسين اوغلو ، مهدي خازن چنزق 1344 نجوگونش ايلي فروردين آينيين دوققوزوندا ادب پرور تبريز شهرينين ده وه چي محلّه سينده ،‌تاجير بير عائله ده دونيايا گوز آچدي . ايلكين تحصيلاتين نظامي ايسه اروندرود مدرسه لرينده آلديقدان صونرا فردوسي آدينا اورتا مكتبه داخل اولدو . رحمتلي خازن 1363 – نجو ايلده همين اورتا مكتبدن علوم تجربي رشته سينده ديپلم الده ائدركن ماذون اولوب و عالي تحصيلات آلماق ايچون تبريز يونيوئرسيته سينين طب فاكولته سينه وارد اولدو .

خازن اوتن ايل تهراندا كئچيريلميش شعر شهيد آدلي پائزيا گئجه سينده دعوتلي اولاراق اشتراك ائتدي . همين ادبي ييغنجاقدان قاييدار كن تهران – تبريز يولوندا زنجانين 35 كيلومتر ليگينده آوتوموبيل توققوشماسي اوزره 1365 نجي ايلين بهمن آيينين 17 سينده خازنين ايللرله مقدس روحونو بنده چكديگي دار قفس صينيب و نهايت اونون الهي روحو دفعه لرله آرزيلاديقي كيمي ملكوته ساري قانادلاندي :

روز و شب جمله برآنم زقفس پيكر خود را –

برهانـــم كه توانـــم بگشايـــم پـــر خـــود را

***

مرحوم خازن جمعيسي 21 ايل عومور سورموشسه ده ائله همين آزمدتلي ياشاييشيني تام تعهد و مسئوليت له باشا آپارميشدير . ائله كي اؤلن زامان اؤزوندن آغير – آغير ادبي و هنري ميراث لار قويمموشدور ؛اوندان قالان ، اثرلر اوست – اوسته بونلاردان عبارت دير :

1-پرواز در آسمان خاطرات ، يا «خاطره لر – سما سيندا اوچوش» آدلي خاطره دفتري

2- خاطره لر و ادبي قطعه لري احتواء ائدن محراب شكفتن آدلي اؤز سسي له لئنتا يا يازيلميش بير كاسئت

3-  حدودا 122 قطعه غزل

4- تبريز راديو – تلويزيا آرشيوينده ساخلانيلان ، اؤز واسطه سيله مباركه مريم سوره سيندن بير نچه آيه نين تلاوتي

5-  بير نچه خط نمونه سي

***

دئديگيم كيمي خازنين خط ، شعر و قرائت قرآن كيمي اوچ بؤيوك و اوجسوز – بوجاقسيز هنر ده جدي چاليشماسي اوموشدور . اؤز يازيلارينا گؤره ايلك دفعه خوشنويسليگه اوزقويور . محله مسجدينين قارانلين بير بوجاقيندا يوسف آقا غيبي آدلي بیر معلم يانيندا همين هنرين ايلكين معلوماتين الده ائديب و ائله همين معلمين تشويقيله ايران خوشنويسلر درنگي نه يول تاپير ، اورادا ايسه گور كملي خطاط حسين رسامين اوزون زحمتلزي و خازنين يورولمادان چاليشمالاري كؤلگه سينده نستعليق خطينده عالي و شكسته ده ايسه ممتاز مدرك لريني الده ائدير.

خوشنويسليكدن كئچديكده خازنين قرآن قرائتيندن سوز آچماليام؛ او قرائت قرآن دادا اولدوقجا باجاريقلي و مهارتلي ايدي . ائله كن بير چوخ قرائت قرآن ياريشلاريندا ائله جه ده تبريزين انگج و ملا حسن مسجد لرينده كئچيريلميش ياريشلاردا اشتراك ائديب ، ممتاز مقام لارا نائل اولموش و نفيس جايزه لر آپارميشدير . حتي او اوقافين ديني ايشلر كل اداره سي طرفيندن قاري نمونه سئچيلميشدير.

شعره گلديکده ایسه دئمه لی یم گنج صنعتکاریمیز اوچ ایل ليك بير تجربه ايله 122 قطعه دن آرتيق غزل ياراتميشديركي انصاف مقاميندا صون زامانلاردا يازديقي غزل لر اولدوقجا قوه لي و احساسلي ديرلار . او حتي شعر مسابقه لرينده اشتراك ائديب و عالي امتيازلارالده ائتميشيدير . مثلا 64 – نجوايلين  فجر دهه سينده اوچونجو ، كنگره شعر شهيدده ايكينجي ، 65- نجي ايلده جوانان امروز مجله سينده بيرينجي مقام لاري الده ائديب و سومين دوره كنگره شعر دانشجويان كشور ده ايسه 10 نفر ممتاز شاعير لرين بيريسي كيمي سئچيلميشدير.

***

تبريزين عموم ارشاد اداره سي خازنين و فاتيندان  صونرا اونون شعر لريني چاپ ائتمك قرارينا گليب ، اومیدواريق لااقل خازنين ايلنينه قدر ارشادين همتي ايله همين كتاب چاپدان بيراخيلسين .

دانيشيقيمين بو حيصه سينده ، رحمتلي خازنين مؤحترم عائله سينه – اولوتانري دان صبر و نيسگيللي گنج شاعيريميزه رحمت ديلركن اونون توركجه شعرلريندن بير نمونه حورمتلي اوخويوجولاريما چاتدير ماقلا برابر سؤز – صحبتيمين ال – آياقين ييغشديريام :

***

اي جانين ائدن فديه ی جانان سنه قوربان

حق عاشيقي اي قانينا غلطان سنه قوربان

اي جمله آمالي آتان حقدن اؤترو

جانانه ائدن جانيني قوربان ، سنه قوربان

وئردين باشيني ، لئيك اونو اگمه دين اصلا

اي مملكت عشقده سلطان ، سنه قوربان

حق وصلتي اوسته جانيني شوقيله آتدين

اي حق دانانين باشينا چوگان ، سنه قوربان

آخشام شفقين گوزلري قان آغليري هرگون

اي قانلي كفن ؛ عالم امكان سنه قوربان

بوعالم خاكي دن اوچوب عرشه پرآچدين

بيزلرده بو ناقابل اولان جان سنه قوربان

گئتدين ولي طوفان كيمي قالخدي هامي ملت

ظولمون آغاجين ائيله دي لرزان ، سنه قوربان

آتدين جانيني ، آتمادين ايمانيني اما

اي جانين آتان ، آتمايان ايمان سنه قوربان

ملت لري جوشه گتيريب قيرميزي قانين

اي پادشه ، جمله ی خوبان سنه قوربان

رنجير تعلّق لري قيردين هامي دوشمن

قالدي بو بؤيوك همّته حيران ، سنه قوربان

هريئرده چيخيب قيرميزي آلاله قانيندان

حسرت چکیری روضه ی رضوان سنه قوربان

تا شئر كيمي قويدون آياقين عرصه جنگه

تولكو نئجه گؤر قاچدي هراسان سنه قوربان

قانين عظمت لي سئل اولوب هر ئيره آخدي

ظاليم كاخيني ائيله دي ويران ، سنه قوربان

ايمان قوشونو فخر ائديري سن كيمي ميره

آماده دي هامي نه دي فرمان ؟ سنه قوربان

آلاله كيمي ماتمينه داغليدي سينم

بو ماتمه اولموش هامي گريان سنه قوربان

بو دونيا سنه تنگ ايدي ، آچدون ملكوته ...

- بال و پريني مرغ خوش الحان سنه قوربان

روزي يئييسن سفره ی يزداندن ايندي

بو دعوی يه شاهد دي بو قرآن ، سنه قوربان

تا دونيادا وار ظولم گرك جنگ ائله يم من

من باغلاميشام سنله بو پئيمان ، سنه قوربان

بيرائيله دعــا خازنـــي اي حقّــه مقــرّب

جانلار سنه قوربان ، سنه قوربان ، سنه قوربان

تبريز رضا افشار پور(اووشار)