گروپونو ياراتماق فيكرينه دوشدوم. بو فيكرى ايره لى سورمكده اليمدن توتا بيله جك كيمسه نى گزيرديم. چئشيدلى شخصيت لرى ذهئنيمدن كئچيرتديكده، ان باجاريقلى و يارارلى كيمسه، ماحمود آقا شاطريانى دويرب، در حال فيكريمي اونونلا اورتايا قويدوم. اوستاد فيكريمى صميمييتله قارشيلاييب، ندن اونو سئچدييمى سوروشدو.

-« بير- يؤندن سنين اؤز قيزين "لاله" و قارداشين قيزلارينى بو گروپا عضو سئجميشم.

باشقا بير طرفدن ايسه سنين ياشى نين يوخارى  اولدوغو هر هانسى بير شوبهه نين اورتايا چيخماسينا مانع اولا بيلر»، دئديم.

قيزلارى كيتابخانانين دفترينه چاغيريب اونلارلا دانيشيق آپارماغيميزا سؤز وئرديك.

گون لرين بيرينده قيزلار بيربير فضولى كيتابخاناسى دفترينه گليب بيزله دانيشيب عضو اولوردولار. بو ايشده بير مسئله ديققتيميزى چكدى. قيزلارين چوخونون آدى توركجه ايدى. ظارافاتلا اوزومو اوستادا توتوب- « سونرا كلن قيزين دا آدى توركجه اولسا داها اونو يازماياقا» دئديم. بو آندا بير قيز ايچه رى گيريكده آدينى سوروشدوم. "دورنا مارالباش دئيه ن حالدا اوستادلا اوره كدن گولوشدرك.

مارإقلى بودور كى، بو قيزين كيچيك آديندان باشقا سوى آدى ايسه توركجه ايدى.

بئله ليك له ايلک قيزلار موسيقى گروبو يارانيب، چاليشمالارى ايسه آرد يجيل اولاراق باشلاندى، نئچه آيدان سونرا تبريزده اوغلان لار اوچون موسيقى ساحه سينده ده فعاليت گؤسترمك چتين اولدوغو بير دورومدا، قيزلار  رسمى حالدا ايلك چيخيش لارينى ايفا ائتديلر. بو چيخيش تبريزين 29 بهمن خسته خاناسى نين قادين ايشچى لرى،  بهزيستى  يه باغلي اولان شهيد مفتح و فياض بخش  بؤلوم لرى و قيزيل آى پارايا باغلى اولان شهيد قاضى قيزلارى نين رسمى چاغريشى ايله تبريز ايشچيلر كلوپو (باشگاه كارگران تبريز) سالونوندا باش توتدو.

آذربايجان قيزلار موسيقى گروپو تبريزده معلول قيزلار، اوچون ايلك بديعى چيخيشلارى ايله رسمى حالدا فعالييته باشلاديلار. فضولى كيتابخاناسينا باغلى اولان بوگروپ 22 صنعتكار قيز توپلانيب كى، ايلك چيخيشلاريندا شرقى  - آذربايجان "بهزيستى" قورومونا باغلى  اولان "شهيد مفتح " آدلى ذهنى خسته ليك-لره توتولان قيزلارا يارديم ائدن "فياض بخش "مركزين

خسته لرى، آى پارايا باغلى اولان  "شهيد قاضى طباطبايى" آدينا يييه سيز  اوشاق لار تربييه مركزى نين قيزلارينا و تبريز  "29 بهمن " خسته خاناسى نين خانيم ايشچيلرى  اوچون آذربايجان موسيقى سينى ايفا ائتديلر.